ዉዳሴ ማርያም ዘሰንበት

           ዉዳሴ ማርያም ዘሰንበተ ክርስቲያን ቅድስት

ውዳሴሃ ለእግዚእትነ ማርያም ድንግል ወላዲተ አምላክ ዘይትነበብ በዕለተ ሰንበተ ክርስቲያን ቅድስት።

1. ተሰመይኪ ፍቅርተ ኦ ቡርክት እምአንስት አንቲ ዉእቱ ዳግሚት ቀመር እንተ ትሰመይ ቅድስተ ቅዱሳን ወዉስቴታ ጽላተ ኪዳን፡፲ቱ ቃላት እለ ተጽሕፋ በአፃብዒሁ ለእግዚአብሔር ቀዲሙ ዜነወነ በየዉጣ እንተ ይእቲ ቀዳሜ ስሙ ለመድኃኒነ ኢየሱስ ክርስቶስ ዘተሰብአ እምኔኪ ዘእንበለ ዉላጤ፡ወኮነ ዓራቄ ለሐዲስ ኪዳን፡ በዉኂዘ ደሙ ቅዱስ አንጽሖሙ ለመሃይምናን ወለሕዝብ ንጹሐን፡ ሰአሊ ለነ ቅድስት።

 ወበእንተዝ  ናዐብየኪ ኩልነ፡ ኦ እግዝእትነ ወላዲተ አምላክ ንጽሕት ኩሎ ጊዜ ንስእል ወናንቀዐዱ ኀቤኪ፡ ከመ ንርከብ ሣህለ በኀበ መፍቀሬ ሰብእ።

2. ታቦት በወርቅ ልቡጥ እምኩለሄ ዘግቡር እምዕፅ ዘኢይነቅዝ ይትሜሰል ለነ ዘእግዚአብሔር ቃለ ዘኮነ ሰብአ ዘእንበለ ፍልጠት ወኢዉላጤ፡ መለኮት ንጹሕ ዘአልቦ ሙስና ዘዕሩይ ምስለ አብ ወቦቱ አብሠራ ለንጽሕት፡ ዘእንበለ ዘርእ ኮነ ከማነ በኪነ ጥበቡ ቅዱስ፡ ዘተሰብአ እምኔኪ ዘእንበለ ርኩስ፡ ደመረ መለኮቶ፡ ሰአሊ ለነ ቅድስት።

3. መቅደስ ዘይኬልልዋ ኪሩቤል እለ ሥዑላን በሥዕለ እግዚአብሔር፡ ቃል ዘተሰብአ እምኔኪ ኦ ንጽሕት ዘእንበለ ዉላጤ ኮነ ሠራዬ ኃጥአትነ ወደምሳሴ አበሳነ፡ ሰአሊ ለነ ቅድስት።

4. አንቲ ዉእቱ መሶበ ወርቅ ንፁሕ እንተ ዉስቴታ መና ኅቡእ፡ ኅብስት ዘወረደ እምሰማያት ወሀቤ ሕይወት ለኩሉ ዓለም፡ ሰአሊ ለነ ቅድስት።

5. እንቲ ዉእቱ ተቅዋም ዘወርቅ እንተ ፆርኪ ማኅቶተ ፀዳል ኩሎ ጊዜ፡ ዘዉእቱ ብርሃኑ ለዓለም፡ ብርሃን ዘእምብርሃን ዘአልቦ ጥንት፡ አምላክ ዘእምአምላክ ዘበአማን፡ ዘተሰብአ እምኔኪ ዘእንበለ ዉላጤ፡ ወበምጽአቱ አብርሃ ላዕሌነ ለእለ ንነብር ዉስተ ጽልመት ወጽላሎተ ሞት፡ ወአርትዐ እገሪነ ዉስተ ፍኖተ ሰላም በምሥጢረ ጥበቡ ቅዱስ፡ ሰአሊ ለነ ቅድስት።

6. አንቲ ዉእቱ ማዕጠንት ዘወርቅ፡ እንተ ፆርኪ ፍሕመ እሳት፡ ቡሩክ ዘነሥአ እመቅደስ ዘይሠሪ ኃጢአተ ወይደመስስ ጌጋየ፡ ዝ ዉእቱ ዘእግዚአብሔር ቃል ዘተሰብአ እምኔኪ ዘአዕረገ ለአቡሁ ርእሶ ዕጣነ ወመሥዋዕተ ሥሙረ፡ ሰአሊ ለነ ቅድስት።

7. ተፈሥሒ ኦ ማርያም ርግብ ሠናይት፡ ዘወለድኪ ለነ ዘእግዚአብሔር ቃለ፡ አንቲ ዉእቱ ጽጌ መዓዛ ሠናይ እንተ ሠረፀት እምሥርወ ዕሤይ፡ ሰአሊ ለነ ቅድስት።

8. በትረ አሮን እንተ ሠረፀት ዘኢንበለ ተክል ወኢሠቀይዋ ማየ፡ ከማሃ አንቲኒ ኦ ወላዲተ ክርስቶስ አምላክነ ዘበአማን ዘእንበለ ዘርእ መጽአ ወአድኀነነ፡ ሰአሊ ለነ ቅድስት።

9. ለኪ ይደሉ ዘእምኩሎሙ ቅዱሳን ተስአሊ ለነ ኦ ምልእተ ጸጋ አንቲ ተዐብዪ እምሊቃነ ጳጳሳት ወፈድፋደ ትከብሪ እምነቢያት ብኪ ግርማ ራእይ ዘየዐቢ እምግርማ ሱራፌል ወኪሩቤል፡ አንቲ በአማን ምክሐ ዘመድነ ወሰአሊት ሕይወተ ለነፍሳቲነ ሰአሊ ለነ ኀበ እግዚእነ ወመድኃኒነ ኢየሱስ ክርስቶስ፡ ያፅንዐነ በርትዕት ሃይማኖት ዉስተ አሚነ ዚአሁ፡ ይጸግወነ ሣህሎ ወምሕረቶ፡ ይሥረይ ኃጢአተነ በብዝኃ ምሕረቱ፡ ሰአሊ ለነ ቅድስት።

Ø ወበእንተዝ ናዓብየኪ ኩልነ ኦ እግዝእትነ ወላዲተ አምላክ ንጽሕት ኩሎ ጊዜ፡ ንስእል ወናንቀዐዱ ኀቤኪ ከመ ንርከብ ሣህለ በኀበ መፍቀሬ ሰብእ።

Ø ጸሎታ ለማርያም ወስእለታ ያድኅነነ እመዓተ ወልዳ።

Ø ጸሎታ ለማርያም ወስእለታ ለርእሰ ሊቃነ ጳጳሳት አባ ማትያስ 
ወአባ መርቆሬዎስ ይዕቀቦሙ እመዓተ ወልዳ።

Ø ጸሎታ ለማርያም ወስእለታ ለሊቀ ጳጳስነ አባ እገሌ…(ኤሊያስ) ይዕቀቦ እመዓተ ወልዳ።

Ø ጸሎታ ለማርያም ወስእለታ ለመምህርነ አባ ወ/ትንሣኤ ወ/ማርያም
Øጸሎታ ለማርያም ወስእለታ ለማኅበርነ ማህበረ ቅዱሳን ይዕቀባ እመዓተ ወልዳ

Ø ጸሎታ ለማርያም ወስእለታ ለሕዝበ ክርስቲያን ይዕቀቦሙ 
እመዓተ ወልዳ።

Ø ጸሎታ ለማርያም ወስእለታ ለሀገረትነ ኢትዮጵያ ይዕቀባ እመዓተ ወልዳ።

Ø ጸሎታ ለማርያም ወስእለታ ለመካኒነ ደብረ እገሌ ...ይዕቀቦሙ 
እመዓተ ወልዳ።

Ø ኦ ማርያም አዕርጊ ጸሎተነ ቅድመ መንበሩ ለእግዚእነ፡፡

http://awdemehret.org/apps/book/

Merge mp3s into one https://mergeaudio.online/merge-mp3