ዉዳሴ ማርያም ዘረቡዕ

ዉዳሴ ማርያም ዘረቡዕ

ዉዳሴሃ ፡ ለእግዝእትነ ፡ ማርያም ፡ ድንግል ፡ ወላዲተ ፡ ኣምላክ ፡ ዘይትነበብ ፡ በዕለተ ፡ ረቡዕ።

ኲሉ ፡ ሠራዊተ ፡ ሰማያት ፡ ይብሉ ፡ ብፅዕት ፡ አንቲ ፡ ሰማይ ፡ ዳግሚት ፡ ዲበ ፡ ምድር ፡ ኆኅተ ፡ ምሥራቅ ፡ ማርያም ፡ድንግል፡ከብካብ ፡ ንጹሕ፡ ወመርዓ ፡ ቅዱስ። ነጸረ ፡ ኣብ ፡ እምሰማይ ፡ ወኢረከበ ፡ ዘከማኪ ፡ ፈነወ ፡ ዋሕዶ ፡ ወተሰብአ ፡ እምኔኪ ፡ ሰአሊ ፡ ለነ ፡ ቅድስት።

ኩሉ ፡ ትዉልድ ፡ ያስተበፅዑኪ ፡ ለኪ ፡ ለባሕትትኪ ፡ ኦ ፡ እግዝእትነ ፡ ወላዲተ ፡ ኣምላክ።

ተነበዩ ፡ ላዕሌኪ ፡ ዐቢያተ ፡ ወመንክራተ ፡ ኦ ፡ ሀገረ ፡ እግዚኣብሔር ፡ እስከ ፡ ኮንኪ ፡ አንቲ ፡ ማኅደረ ፡ ለፍሡሐን ፡ ኲሎሙ ፡  ነገሥተ ፡ ምድር ፡  የሐዉሩ ፡  በብርሃንኪ ፡  ወአሕዛብኒ ፡  በፀዳልኪ ፡  ኦ ፡  ማርያም ፡  ኩሉ ፡  ትዉልድ ፡  ያስተበፅዑኪ ፡  ወይሰግዱ ፡  ለዘተወልደ ፡  እምኔኪ ፡  ወያዐብይዎ። ሰአሊ ለነ ቅድስት።

ኣንቲ ፡ ዘበአማን ፡ ደመና ፡ እንተ ፡ ኣስተርአይኪ ፡ ለነ ፡ ማየ ፡ ዝናም ፡ ትእምርተ ፡ ዋሕዱ ፡ ረሰየኪ ፡ ኣብ ፡ መንፈስ ፡ ቅዱስ ፡ ኃደረ ፡ ላዕለኪ ፡ ወኃይለ ፡ ልዑል ፡ ጸለለኪ ፡ ኦ ፡ ማርያም ፡ ኣማን ፡ ወልድኪ ፡ ቃለ ፡ ወልደ ፡ ኣብ ፡ ዘይነብር ፡ ለዓለም ፡ መጽአ ፡ ወአድኃነነ ፡ እምኃጢአት ፡ ዓብይ ፡ ዉእቱ ፡ ክብር ፡ ዘተዉህበ ፡ ለከ ፡ ኦ ፡ ገብርኤል ፡ መልአክ ፡ ዜናዊ ፡ ፍሡሐ ፡ ገጽ ፡ ሰበከ ፡ ለነ ፡ ልደተ ፡ እግዚእ ፡ ዘመጽአ ፡ ኃቤነ ፡ ወአብሠርካ ፡ ለማርያም ፡ ድንግል ፡ ዘእንበለ ፡ ርስሐት ፡ ወትቤላ ፡ ተፈሥሒ፡ ኦ ፡ ምልእተ ፡ ጸጋ ፡ እግዚኣብሔር ምስሌኪ። ሰኣሊ ለነ ቅድስት።

ረከብኪ ፡ ጸጋ ፡ መንፈስ ፡ ቅዱስ ፡ ኃደረ ፡ ላዕሌኪ ፡ ወኃይለ ፡ ልዑል ፡ ጸለለኪ ፡ ኦ ፡ ማርያም ፡ አማን ፡ ወለኪ ፡ ቅዱስ ፡ መድሓኑ ፡ ለኩሉ ፡ ዓለም ፡ መጽአ ፡ ወአድኃነነ። ሰአሊ ለነ ቅድስት።

ግብረ ፡ ድንግል ፡ ይሴብሕ ፡ ልሳንነ ፡ ዮም ፡ ንወድሳ ፡ ለ ማርያም ፡ ወላዲተ ፡ አምላክ ፡ በእንተ ፡ ዘተወልደ ፡ እምኔሃ ፡ በሀገረ ፡ ዳዊት ፡ እግዚእነ ፡ ወመድኃኒነ ፡ ኢየሱስ ፡ ክርስቶስ ፡ ንዑ ፡ ኩልክሙ ፡ ኣሕዛብ ፡ ናስተብፅዓ ፡ ለማርያም ፡ እስመ ፡ ኮነት ፡ እመ ፡ ድንግል ፡ ወፅሙረ ፡ ተፈሥሒ ፡ ኦ ፡ ድንግል ፡ ንጽሕት ፡ እንተ ፡ አልባቲ ፡ ርኩስ ፡ ዘመጸ ፡ ቃለ ፡ ኣብ ፡ ወተሰብአ ፡ እምኔሃ። ተፈሥሒ ፡ ኦ ፡ ሙዳይ ፡ እንተ ፡ አልቦቲ ፡ ነዉር፡ ፍጽምት ፡ ዘአልባ ፡ ርስሐት። ተፈሥሒ ፡ ኦ ፡ ገነት ፡ ነባቢት ፡ ማኅደሩ ፡ ለክርስቶስ ፡ ዘኮነ ፡ ዳግማይ ፡ ኣዳም ፡ በእንተ ፡ ኣዳም ፡ ቅዳሚ ፡ ብእሲ ፡ ተፈሥሒ ፡ ኦ ፡ ፀ ዋሪቱ ፡ ለዋሕድ ፡ ለዘኢ ፡ ተፈልጠ ፡ እምኅፅነ ፡ አቡሁ ፡ ተፈሥሒ ፡ ኦ ፡ ከብካብ ፡ ንጹሕ ፡ ሥርግዉ ፡ በኩሉ ፡ ሥነ ፡ ስብሐት ፡ መጽአ ፡ ወተሰብአ ፡ እምኔኪ ፡ ተፈሥሒ ፡ ኦ ፡ ዕፀ ፡ ጰጦስ ፡ እንተ ፡ ኢያዉዓያ ፡ መለኮት ፡ ተፈሥሒ ፡ ኦ ፡ አመት፡ ወእም ፡ ድንግል ፡ ወሰማይ ፡ ሰማያዌ ፡ እንተ ፡ ፆረት ፡ በሥጋ ፡ ዘይፄዐን ፡ ዲበ ፡ ኩሩቤል ፡ ወበእንተዝ ፡ ንትፈሥሕ ፡ ወንዘምር ፡ ምስለ ፡ መላእክት ፡ ቅዱሳን ፡ ብፍሥሓ ፡ ወበኅሤት ፡ ወንበል ፡ ስብሐት ፡ ለእግዚአብሔር ፡ በሰማያት ፡ ወሰልላም ፡ በምድር ፡ ሥምረቱ ፡ ለሰብእ ፡ እስመ ፡ ኪያኪ ፡ ሠምረ ፡ ዘሎቱ ፡ ክብር ፡ ወሰብሐት። ሰአሊ ለነ ቅድስት።

የዐቢ ፡ ክብራ ፡ ለማርያም ፡ እምኩሎም ፡ ቅዱሳን ፡ እስመ ፡ ድልወ ፡ ኮነት ፡ ለተወክፎ ፡ ቃለ ፡ አብ ፡ ዘይፈርህዎ ፡ መላእክት ፡ ወየኩትዎ ፡ ትጉሃን ፡ በሰማያት ፡ ጾረቶ ፡ ማርያም ፡ ድንግል ፡ በከርሣ ፡ ይእቲ ፡ ተዐቢ ፡ እምኪሩቤል ፡ ወትፈደፍድ ፡ እምሱራፌል ፡ እስመ ፡ ኮነት ፡ ታቦት ፡ ለሐዱ ፡ ዘእምቅድስት ፡ ሥላሴ  ዛቲ ፡ ይእቲ ፡ ኢየሩሳሌም ፡ ሀገሮሙ ፡ ለነብያት ፡ ወማኅደረ ፡ ፍሥሐሆመ ፡ ለኩሎም ፡ ቅዱሳን ፡ ሕዝብ ፡ ዘይነብር ፡ ዉስተ ፡ ጽልመት ፡ ወጽላሎተ ፡ ሞት ፡ ብርሃን ፡ ዐቢይ ፡ ሰረቀ ፡ ላዕሌሎሙ ፡ እግዚኣብሔር ፡ ዘየዐርፍ ፡ በቅዱኣስኒሁ ፡ ተሰብአ ፡ እምድንግል ፡ ለመድኃኒተ ፡ ዚአነ ፡ ንዑ ፡ ርእዩ ፡ ዘንተ ፡ መንክር ፡ ወዘምሮ ፡ ዘምሩ ፡ በእንተ ፡ ምሥጢር ፡ ዘተከሥተ ፡ ለነ ፡ እስመ ፡ ዘኢይሰባእ ፡ ተሰብአ ፡ ቅል ፡ ተደመረ ፡ ወዘአልቦ ፡ ጥንት፡ ኮነ ፡ ቅድመ ፡ ወለዘአልቦ ፡ መዋዕል ፡ ኮነ ፡ ሎቱ ፡ መዋዕል ፡ ዘኢይትዐወቅ ፡ ተከስተ ፡ ወኢይትረአይ ፡ ተራእየ ፡ ወልድ ፡ እግዚኣብሔር ፡ ሕያዉ ፡ ጥዩቀ ፡ ኮነ ፡ ሰብአ ፡ ኢየሱስ ፡ ክርስቶስ ፡ ዘትማልም ፡ ወዮም ፡ ወክመ ፡ ዉእቱ ፡ እስከ ፡ ለዓለም።  ኣሓዱ ፡ ህላዌ ፡ ሎቱ ፡ ንስግድ ፡ ወንሰብሕ ፡ ሰአሊ ለነ ቅድስት።

ሕዝቅኤል ፡ ነቢይ ፡ ኮነ ፡ ስምዐ ፡ በእንቲኣሃ ፡ ወይቤ ፡ ርኢኩ ፡ ኆኅተ፡ በምስራቅ ፡ ኅቱም ፡ በዐቢይ ፡ መንክር ፡ ማኅተም ፡ ኣልቦ ፡ ዘቦአ ፡ ዘእንበለ ፡ እግዚኣብሔር ፡ ኃያላን ፡ ቦአ ፡ ዉስቴታ ፡ ወወዕአ ፡ ሰአሊ ለነ ቅድስት።

ኆኅትስ ፡ ድንግል ፡ ይእቲ ፡ እንተ ፡ ወለደት ፡ ለነ ፡ መድኃነ ፡ እምድኅረ ፡ ወለደት ፡ ኪያሁ ፡ ነበረት ፡ በድንግልና ፡ ከመ ፡ ትካት። ቡሩክ ፡ ዉእቱ ፡ ፍሬ ፡ ከርሥኪ ፡ ኦ ፡ ወላዲተ ፡ እግዚእ ፡ ዘመጽአ ፡ ወአድኃነነ እምእድ ጸላኢ ዘአልቦ ምሕረት፡ አንቲ ፡ ፍጽምት ፡ ወቡርክት ፡ ረከብኪ ፡ ሞገሰ ፡ በኀበ ፡ ንጉሠ ፡ ስብሐት ፡ አምላክ ፡ ዘበአማን ፡ ለኪ ፡ ይደሉ ፡ ዕበይ ፡ ወክብር ፡ እምኩሎሙ ፡ እለ ፡ ይነብሩ ፡ ዲበ ፡ ምድር ፡ ቃለ ፡ አብ ፡ መጽአ ፡ ወተሰብአ ፡ እምኔኪ ፡ ወአንሶሰወ ፡ ምስለ ፡ ሰብእ ። እስመ ፡ መሐሪ ፡ ዉእቱ ፡ ወመፍቀሬ ፡ ሰብእ ፡ አድኃነ ፡ ነፍሳቲነ ፡ በምጽአቱ ፡ ቅዱስ ፡ ሰአሊ ለነ ቅድስት።